பிறவி கோளாறுகளால் குழந்தைகளுக்கு ஏற்படும் பாதிப்புகள் - தமிழ் சித்த மருத்துவம்

 குழந்தை பிறந்தவுடன் குழந்தையும் தாயும் இரண்டு உடல்களாக, இரண்டு உயிராகப் பிரிந்ததும் தாய் மகிழ்ச்சி அடைகிறாள். கணவனும் மகிழ்ச்சி அடைகிறான். இது எல்லோர் வாழ்க்கையிலும் நடப்பதுதான்.

ஆனால், இதற்கு மாறாகச் சில தாய்மார்களுக்குக் குழந்தை பிறந்தவுடன் பிறந்த குழந்தை கண்ணோ, மூக்கோ, வாயோ, உதடோ, கைகால்களோ கோரமாக அமைந்துவிட்டால் பெற்றவள் முகம் சுளிக்கிறாள்.

 குழந்தை பிறந்தவுடன் சில குழந்தைகள் அங்கஹீனமாகவும், பிறந்த சில காலத்திற்குள் அவலட்சணமாகவோ அமைந்து விடுவது உண்டு. இந்தக் குறைகளைப் பிறவிக் கோளாறு என்று சொல்லுவார்கள்.

ஜீன்கள் என்று சொல்லப்படும் பாரம்பரியத்திற்கு ஆதாரமான ஒரு பொருளில் கோளாறு ஏற்பட்டுத் தோன்றுகின்ற குறைபாடுகளே இவை. ஜீன்களில் ஏற்படும் விபரிதங்களால் உதடுகள் பிளந்தும், நாக்கு ஒட்டியும். காதுகள் சிதைந்தும், விரல்கள் ஒட்டியும் ஆறு விரல்களாகப் பிரிந்தும், கவட்டைக் கால்களுடனும் சில குழந்தைகள் பிறக்கின்றன. 

இவை கண்களுக்குத் தெரிந்த பிறவிக் கோளாறுகள். சில கண்களுக்குத் தோன்றாமல் மறைந்து நின்று குழந்தைகளுக்குத் துன்பம் தருபவை. நீர்க் கட்டிகள் என்று சொல்லப்படும் (Cysts) நுரையீரலிலும் சிறுநீரகத்திலும் தோன்றி குழந்தைகளுக்குத் தொந்தரவு கொடுக்கும்.

இது தவிர (Blue baby) என்று செல்லப்படும் நீலக் குழந்தைகள் இருதயக் கோளாறுகள் தோன்றுகின்றன. நீலம் பாய்ந்த குழந்தைகள் நீண்ட நாட்கள் வாழமுடியாத சூழ்நிலை ஒரு காலத்தில் இருந்தது. நவீன மருத்துவ சிகிச்சைகளால் இந்தக் குறைகளை மெல்லப் போக்கி வருகிறார்கள்.

பிறவி இருதயக் கோளாறுகள் எப்படித் தோன்றுகின்றன? வைரஸ் கிருமிகள் நஞ்சுக் கொடியின் வழியாகப் புகுந்து இருதயத்தைக் தாக்குவதால் இருதயம் பழுதடைந்து உறுப்புகளில் பாதிப்புகளை உண்டாக்கு கின்றன. இது தவிர, பிறவிலேயே தாக்கும் இன்னொரு நோய் ஹேமோபைலியா, இரத்த நாளங்களிலிருந்து சுரக்கும் இரத்தம் இயற்கைக்கு மாறுபட்டுக் கட்டுப் படாமல் போகும் நிலைதான் இரத்தக் கசிவு நோய். 

இது ஆண் குழந்தைகளுக்கே அதிகமாகத் தோன்றுகிறது என்று டாக்டர்கள் கூறுகிறார்கள். இதனால் என்ன கோளாறு உண்டாகிறது என்று கேட்கலாம். குழந்தைகளுக்கு எங்காவது அடிபட்டால் இரத்தக் கசிவு அதிகமாக ஏற்பட்டு உடலிலிருந்து அதிகமான இரத்தம் வெளியேறி விடுகிறது இரத்தம் உறையும் தன்மையை இழந்து விடுவதால் வேறு சில சிக்கல்கள் தோன்றுகின்றன.

தாய் தந்தையர்களிடையே இரத்த அமைப்பில் வித்தியாசம் தோன்றிக் குழந்தைகளுக்கு இரத்தச் சோகையையும், மஞ்சள் காமாலையையும் உண்டாக்கக் கூடும். இரத்தப் பிரிவுகளில் ஒன்றான R.H. பரம்பரையின் மாற்றத்தால் தாய்க்கு இல்லாமலிருந்து, தந்தைக்கு இருந்து விட்டால் கடுமையான மஞ்சள் காமாலை நோய் தோன்ற வாய்ப்பு உண்டு.

குடும்பத் தொடர்பான நோய்களாலும் அதாவது நீரிழிவு, இரத்தக் கொதிப்பு, ஆஸ்துமா, அலர்ஜி, அல்சர், புற்றுநோய் காரணமாகவும் குழந்தைகளுக்குப் பிறவிக் கோளாறுகள் உண்டாகலாம்.

நெருங்கிய உறவில் பெண் எடுப்பதும், பெண் கொடுப்பதும் இதுபோன்ற பிறவிக் கோளாறுகளுக்குக் காரணமாக அமையலாம்.

இரகசிய நோய்களாலும் குழந்தைகளுக்குப் பாதிப்பு ஏற்படுகிறது. ஆகவே பிறவிக் கோளாறுகளுக்கு ஏராளமான காரணங்கள் இருந்தாலும், உறுப்புச் சிதைவுகளைப் பொறுத்தவரை சர்ஜரி மூலம் பெரும்பகுதி சரிப்படுத்தி விடலாம் என்ற நம்பிக்கை இப்போது ஏற்படும் அளவுக்கு மருத்துவ விஞ்ஞானம் வளர்ந்திருக்கிறது.